West Bengal Governor Visits Kerala House

വെസ്റ്റ് ബംഗാൾ ഗവർണർ കേരള ഹൗസ് സന്ദർശിച്ചു

ന്യൂഡൽഹി: വെസ്റ്റ് ബംഗാൾ ഗവർണർ ഡോ. സി.വി. ആനന്ദബോസ് കേരള ഹൗസ് സന്ദർശിച്ചു. ഗവർണറായി ചുമതലയേറ്റ ശേഷമുള്ള അദ്ദേഹത്തിന്റെ ആദ്യത്തെ കേരള ഹൗസ് സന്ദർശനമാണ്. കേരള സർക്കാരിന്റെ ഡൽഹിയിലെ പ്രത്യേക പ്രതിനിധി പ്രൊഫ. കെ.വി. തോമസും റസിഡന്റ് കമ്മീഷണർ സൗരഭ് ജെയിനും ചേർന്ന് ഗവർണറെ പൊന്നാട അണിയിച്ചും ബൊക്കെ നൽകിയും  കൊച്ചിൻ ഹൗസിൽ  സ്വീകരിച്ചു. പ്രത്യേക പ്രതിനിധിയെ ഗവർണറും പൊന്നാടയണിയിച്ചു. ഒരു മണിക്കൂറോളം ഗവർണർ കേരള ഹൗസിൽ ചെലവഴിച്ചു. കേരള ഹൗസിൽ എത്തുന്നത് വീട്ടിൽ എത്തുന്നതു പോലെയാണെന്നും എല്ലാവരെയും കാണാൻ കഴിഞ്ഞതിൽ സന്തോഷമുണ്ടെന്നും അദ്ദേഹം പറഞ്ഞു. പ്രൊഫ. കെ.വി. തോമസുമായി പ്രവർത്തിച്ച കാര്യങ്ങൾ അനുസ്മരിച്ച അദ്ദേഹം മനുഷ്യബന്ധമാണ് അദ്ദേഹത്തിൽ നിന്ന് പഠിച്ച വലിയ പാഠമെന്നും പറഞ്ഞു.  കേരളവുമായി ബന്ധപ്പെട്ട വികസന  വിഷയങ്ങളിൽ  കിട്ടാവുന്ന സഹായങ്ങൾ നേടിയെടുക്കേണ്ടതുണ്ടെന്നും ബംഗാൾ ഗവർണറുടെ സഹായവും പ്രയോജനപ്പെടുത്തുമെന്നും പ്രൊഫ. കെ.വി. തോമസ് പറഞ്ഞു. കൊൽക്കത്ത രാജ്ഭവൻ പ്രസിദ്ധീകരിച്ച,  ഗവർണർ എഴുതിയ, സൈലൻസ് സൗണ്ട്സ് ഗുഡ് എന്ന പുസ്തകവും മറ്റ് സമ്മാനങ്ങളും  അദ്ദേഹം പ്രത്യേക പ്രതിനിധിക്കും റസിഡന്റ് കമ്മീഷണർക്കും മറ്റ് ഉദ്യോഗസ്ഥർക്കും സമ്മാനിച്ചു.